[吃貨篇] 國產巴蜀懶人麻辣火鍋 西西臉小姐肥妹宵夜之選


小妹我都好鐘意食宵夜，12點過後係一個人既時間，煲劇睇書聽歌都會係呢段時間入面享受，已經唔想食杯面？今次不如等我挑戰下淘寶購入既巴蜀懶人麻辣火鍋！

雖然係淘寶野，但你睇到呢個成交紀錄就知有幾狂熱啦，仲曾經賣過去香港，賣得咁誇張今次諗都無諗就訂左三個番香港試一試！

經集運到香港，買2送1除番開連運費大概需要26蚊，拎上手好聚手，份量應該都好足！

拆開面蓋後，所有材料都係晒到~~獨立真空包裝夠晒衛生！設計就分左兩層，好似吉野家外賣盒咁~~

兩層既材料包，包括：有鵪鶉蛋3粒，湯底，雞肉腸，蓮藕薯仔片，紅薯粉，發熱包，香精油。

我地需要做既野就係將所有材料放入去上層個格，加水蓋滿晒所有材料！
然後，呢個位就將發熱包放落去下再將少少水放到指定指上面，等十至十五分鐘就完成嫁啦！係咪好簡單呢！！


等待中….其間你只需要放佢一個安全地方就可以，因為發熱包會好高溫！會聽到朴朴朴既煲水聲就正確嫁啦
經過十五分鐘過後，打開見到色水同香味都非常唔錯！！香到屋企d貓都忍唔住入晒黎望下，聞落去好似巴蜀烤魚既味道！

腸仔好懶無切開…..灌切呢個懶人既主題
我唔客氣啦！肥妹仔要開動啦！

個人感覺，覺得整體味道都有8分，最欣賞佢既薯粉粗幼度適中，而且好有咬口！
第二樣鐘意係蓮藕片！！好爽口，唔粉感！



最唔鐘意係腸仔，可能我鐘意脆口少少既腸仔質感，呢款有d似扎肉，好軟身
我覺得除左係屋企做下一人火鍋外，帶去行山露營都幾好，用半枝水就可以有又熱又香既巴蜀麻辣鍋！又或者可以自己加幾塊肥牛片落去，改一改個料又有另一款配搭！


今次係我自己既付費小分享，希望大家鐘意啦！！

喜歡的記得Subscribe 我的專頁
品牌合作邀請，請電郵到 xxcandice0328xx@gmail.com
-------------------------------
BLOG Channel
Name : Candice ( Candiicexx)
Ig : Candiicexx / makeup work profile  : Candiicexxmakeup


免責聲明:
本文章所發表的全部內容均屬個人意見及感受，並不代表該品牌之言論及立場。

如需協助或希望獲得更多有關產品資訊, 請直接聯絡該品牌查詢或尋求相關專業意見

留言

發佈留言

熱門文章